Es git Leit,
die verstehn sich unnernanner ganz prima,
solang se nit mitnanner schwetze.
(Un das is dann es Gehetääl vun Pingste)
Was ä Wort doch ausmicht
Geschäftsleit wisse das. Es kann ebbes noch so gut sin, noch so gut aussiehn, noch so billig sin. Manichmoh gucke die Leit gar nit denoh un kä Mensch wääß warum.
So is es aach em Bäcker gang. De war stolz druf, dass er noch alles selwer backe konnt un an all seine Sache aach Geschmack dran war. So harr-er aach moh Weckmehl gemach un in seine Lare gestallt. Große dorchsichtige Beutel, die hon zwar de gure Geruch inne drin gehall, awer dies chön Farb war gut ze siehn. Un de Preis war nou werklich aach nit iewermäßig hoch.
Trotzdem, es hot kä Mensch denoh geguckt, geschweihe dann gegriff.
Die Leit hon schun iewerlaacht, sie müsste alles fortschmeiße, ehb’s schlecht dät were. Do kam es Lehrmädche ous de Berufsschol un saat: „Eich wääß was.“
Es hot sich es Preisschild gehult, en dickeSchreibstift un ä Wort debei geschrieb. Suns is alles geblieb wie’s war.
Ob dehr’s glaabt ore nit, am nächste Daach war das Weckmehl all all. Es is sogar noch denoh gefroht wor.
Un wisst dehr, was das Lehrmädche geschrieb hatt? Sonderangebot.
Es neiste Sonderangebot: Ostere, dann Hiemelfahrt, dann Pingste, dann Fronleichnam, dann lang nix. Un dann is noch emoh Feierdaach an Allerheiliche.
Nor for Weihnachte brauche mer kä Sonderangebot. Das wolle se aach so all.